Kórnekti qazaq energetıgi Shapyq Shókın – Qazaqstan energetıkasyn damytýǵa arnalǵan «Qazaqstan energetıkasy», «Aýylsharýashylyǵyn energııamen qamtamasyz etýdiń ǵylymı negizderi», «Qazaqstan energetıkasyn damytýdyń negizderi», «Energetıka jáne Qazaqstannyń sý sharýashylyǵy», «Qazaqstannyń jylý-energetıkalyq balansy» sııaqty 500-den asa ǵylymı eńbektiń avtory. Qazaqstan Respýblıkasynyń Prezıdenti Nursultan Nazarbaev 1996 jyly akademık Shapyq Shókınge «Halyq Qaharmany» ataǵyn bergen bolatyn.
Eskertkishtiń ashylý rásimine qatysqan Almaty qalasynyń ákimi Baýyrjan Baıbek Shapyq Shókınniń jańashyl ǵylymı eńbekteri arqyly óz kezeńiniń qoǵamdyq sanany jańǵyrtýshysy bolǵandyǵyn atap ótti. «Ol Qazaq energetıka ǵylymı- zertteý ınstıtýtynyń alǵashqy dırektory boldy. Akademık Shókın basqarǵan kezde ınstıtýt elimizdegi qundy eksperımentaldy bazasy bar, tipti keıbir zertteýleri boıynsha álemde balamasy joq iri ári jańashyl ǵylymı mekemege aınaldy. Qazaqstannyń energetıka salasyndaǵy ǵylymı jańalyqtarynyń barlyǵy osy ınstıtýtpen baılanysty. Shapyq Shókınniń tikeleı aralasýymen Qazaqstan energetıkasy ǵylymı-tehnıkalyq boljamynyń keshendi júıesi, Ertis-Qaraǵandy kanalynyń, Qapshaǵaı gıdroelektrostansııasynyń jobalary jasaldy», – dedi Almaty ákimi.
Birshama ýaqyt buryn Almaty ákimdigi Shapyq Shókın eskertkishiniń úzdik eskızine ashyq baıqaý jarııalap, sol baıqaýdyń nátıjesinde, Qazaqstanda qoıylatyn eskertkishter men monýmentter jónindegi memlekettik komıssııa sheshimimen Qazbek Jarylǵapov pen Mırlan Azmaǵambetov jasaǵan eskız úlgileri úzdik dep tanylǵan edi.
Saltanatty sharaǵa akademıktiń uly Qanat Shókın, energetıka ǵylymı-zertteý ınstıtýtynyń prezıdenti Halyq Abdýllaev, Almaty Qoǵamdyq keńesiniń tóraǵasy Rahman Alshanov, arheolog ǵalym Karl Baıpaqov, Almaty máslıhatynyń depýtaty Nurlan Muhamed-Rahımov, jazýshy Beksultan Nurjekeev, ǵylymı-zertteý ınstıtýtynyń qyzmetkerleri men ardagerleri qatysty.
Mıra BAIBEK,
«Egemen Qazaqstan»
